Pobl Cymru, mae’n amser codi eich llais – fel bod peiriannau’r dyfodol yn ein deall ni.

Gan | 18/09/2018

Sut fyddwch chi’n siarad gyda’ch gweision? Ddim yn gwestiwn cyffredin y dyddiau hyn ond yn y dyfodol efallai. Ac mae’n well paratoi ar gyfer y diwrnod hwnnw nawr.

Yn ddiweddar, mae Mozilla, y sefydliad rhyngrwyd Americanaidd sy’n cynhyrchu Firefox a Thunderbird, anogwyr preifatrwydd a diogelwch ar-lein, wedi lansio estyniad o’u hymdrechion i greu offer i’ch galluogi i siarad gyda pheiriannau.

Dim byd newydd yn fanna, medde chi, ond nid menter gaeedig fasnachol fel gydag Amazon, Apple neu Microsoft. Bydd hwn ar gael ar gyfer pob datblygwr i’w ddefnyddio yn eu technolegau newydd yn y dyfodol.

Rhaid i ni wneud yn siŵr fod holl acenion Saesneg ar draws Cymru’n cael eu cynnwys, er mwyn gwneud yn siŵr fod dyfeisiau’n deall ac ymateb i bawb ymhob rhan o’n gwlad. O na fyddai’n gweision cyhoeddus yn gallu gwneud hynny!

Ond dyw e ddim yn unig ar gyfer y Saesneg. Un o’r prif bwyntiau diddordeb yng Nghymru yw bod y drws wedi ei agor ar gyfer ieithoedd eraill, gan gynnwys Almaeneg, Ffrangeg a, ie – y Gymraeg.

Mae hyn yn adlewyrchu gwaith ar y cyd gyda’r Uned Technolegau Iaith ym Mhrifysgol Bangor a Mozilla.

Roedd yr Uned Technolegau Iaith wedi cychwyn ar raglen i ddatblygu meddalwedd lleferydd Cymraeg yn sgil poblogrwydd Alexa, Amazon a Siri, Apple.

Gofynnwch mewn unrhyw ysgol gynradd a bydd gan lawer o’r plant y technolegau hyn adref. Ond heb dechnoleg llais Cymraeg bydd y Gymraeg yn cael ei thanseilio fel iaith y cartref.

Roedd Paldaruo, enw rhaglen yr Uned Technolegau Iaith, yn llwyddiant mawr, a chyflwynodd llawer o siaradwyr Cymraeg eu lleisiau i’r rhaglen.

Gyda menter newydd Mozilla, Common Voice, mae’r Uned yn gallu adeiladu ar dechnolegau mwy pwerus a manteisio ar gyrhaeddiad byd-eang Mozilla.

Mae Common Voice ar gael yn voice.mozilla.org, cliciwch ar y brig am y dudalen ar gyfer y Gymraeg neu’r Saesneg.

Cyfrannwch yn y ddwy iaith, os fedrwch chi. Gofynnwch i’ch ffrindiau a theulu i wneud hefyd.

Mae angen miloedd o leisiau o bob rhan o Gymru, yn Gymraeg a Saesneg i sicrhau fod hyn yn dechnoleg effeithiol sy’n gweithio ar gyfer pawb yn y wlad.

Ymddangosodd fersiwn Saesneg o’r darn ar Nation.cymru at Mehefin 9, 2018.

People of Wales, it’s time to speak up – so that the machines of the future understand us

Gadael Ymateb

Ni fydd eich cyfeiriad e-bost yn cael ei gyhoeddi. Mae'r meysydd gofynnol yn cael eu marcio *

Mae'r wefan hon yn defnyddio Akismet i leihau sbam. Dysgwch sut mae eich data sylwadau yn cael ei brosesu .